Mastaa Wamwaga Machozi: Ukweli Mzima Kuhusu Kifo cha Diogo Jota

Dunia ya soka imo katika mshtuko mkubwa kufuatia kifo cha mshambuliaji nyota wa Liverpool na timu ya taifa ya Ureno, Diogo Jota, aliyeaga dunia katika ajali mbaya ya gari iliyotokea nchini Hispania tarehe 3 Julai 2025.

Kwa mujibu wa taarifa rasmi kutoka vyombo vya usalama vya Hispania (Guardia Civil), Jota, mwenye umri wa miaka 28, alikuwa akisafiri na kaka yake André Silva katika gari aina ya Lamborghini Urus kuelekea bandarini Santander. Walikuwa njiani kwenda kuchukua feri kuelekea Liverpool baada ya Jota kupokea ushauri wa kiafya kuepuka kusafiri kwa ndege kufuatia upasuaji mdogo wa mapafu alioufanyiwa hivi karibuni.

Ajali hiyo ya kutisha ilitokea wakati dereva alipokuwa akijaribu kupita gari jingine kwa kasi, ambapo tairi la gari lilivunjika ghafla. Gari liliteleza, likapinduka mara kadhaa na baadaye kulipuka moto mkubwa uliowateka ndani wote wawili.

Mashuhuda wa tukio hilo waliwaona maafisa wa usalama wakijitahidi kufika eneo la tukio kwa haraka, lakini tayari ilikuwa imechelewa — miili ya Jota na kaka yake ilipatikana ikiwa imeungua vibaya, na walithibitishwa kufariki papo hapo.

Taarifa ya Klabu ya Liverpool ilitolewa muda mfupi baadaye ikisema:

"Tumehuzunishwa sana na taarifa za kuondokewa na mchezaji wetu mpendwa, Diogo Jota. Alikuwa zaidi ya mchezaji — alikuwa rafiki, kiongozi, na mshindi. Pole kwa familia yake, mashabiki, na taifa zima la Ureno."

Katika kipindi chake akiwa Liverpool, Jota alijizolea umaarufu mkubwa kutokana na kasi yake, uwezo wa kufunga mabao muhimu, na nidhamu ya hali ya juu. Mashabiki wa soka duniani kote wamekuwa wakimiminika mitandaoni kuomboleza kifo chake na kuelezea namna alivyogusa maisha yao.

Chanzo cha Kifo kwa Ufupi:

• Ajali ya gari iliyotokana na tairi kupasuka wakati wa kujaribu kupita gari lingine.

• Gari lilipinduka na kulipuka moto.

• Diogo Jota na kaka yake walifariki papo hapo.